About Us

यस नवज्योति बहिरा माध्यमिक विद्यालय बहिरा (सुनाई तथा बोलाई सम्बन्धी बहिरा एवम् सुस्तश्रवण भएका बालबालिकाहरु र सो संग जोडिएर आउने न्युनदृष्टि, शारीरिक एवम् श्रवणदृष्टिविहिन) बालबालिकाहरुलाई सांकेतिक भाषाको माध्यम द्वारा निःशुल्क पठन पाठन गराउने एक मात्र विशेष विद्यालय हो । शारिरीक र मानसिक रुपमा तन्दुस्त भएका बहिरा बच्चाहरु आफ्नो घर गाउँ नजिक उनिहरुको समस्या अनुकुल पढ्ने विद्यालय नहुँदा पढ्न नपाई घर परिवार तथा समाज बाट हेपिएर रहेको अवस्थालाई ख्याल गर्दै यस विद्यालयको स्थापना २०५९ सालमा भएको हो । सुरुवातमा सिन्धुली बहिरा संघले अनौपचारिक रुपमा सांकेतिक भाषाको कक्षाबाट प्रारम्भ गरी २०६० साल देखि जि.शि.का. सिन्धुली बाट कक्षा संचालनमा अनुमति पाई औपचारिक विद्यालय संचालनमा रहेको छ । सांकेतिक भाषाको माध्यमबाट पढाइ हुने यस विद्यालयमा पढ्न आउने सम्पुण विद्यार्थीहरुलाई आवास (छात्रावास) को सुविधा रहेको छ यहाँ खाना, बस्न र पढ्न कुनै पनि शुल्क लाग्दैन । छात्रावासमा र पढ्नका लागि चाहिन सम्र्पुण सामाग्री (जस्तैः ओड्ने, ओछ्याउने, खाना खाने भाँडा), पाठ्य पुस्तक र अन्य शैक्षिक सामाग्री विद्यालयलेनै निःशुल्क रुपमा दिने गरेको छ । यस विद्यालयमा हाल विभिन्न जिल्लाका करिब ५४ (१ भारती ) २००+ जना विद्यार्थीहरु छात्रावासमा बसेर पठन पाठन गरिरहेका छन् भने विद्यालय कक्षा नेपाली साङ्केतिक भाषाको माध्यमबाट बालविकास(ECD) कक्षा देखि १२ कक्षा सम्म संचालनमा रहेको छ । अहिले विद्यालयमा शिक्षक, कर्मचारी गरी २३ जना कार्यरत रहेका छन् । यस विद्यालयलाई कमलामाइ नगरपालिका, सिन्धुली, शिक्षा विकास तथा संमन्वय इकाइ सिन्धुली र सिन्धुली बहिरा संघ मार्फत नेपाल राष्ट्रिय बहिरा महासंघले सहयोग गरिरहेको छ भने समय समयमा प्लान नेपाल लगायतका अन्य गैरसरकारी संस्थाको पनि सहयोग हुँदै आएको छ ।